5 il əvvəl Paşinyana Kəlbəcər və Laçınla bağlı nə təklif edilib? | Erməni siyasətçidən açıqlama

“2019-cu ildə Minsk qrupunun həmsədrləri Nikol Paşinyan hökumətinə Kəlbəcər və Laçının Ermənistanın tərkibində saxlanılması ilə sülhün əldə edilməsini təklif etdi”.

Bunu erməni siyasətçi Levon Zurabyan deyib.

Siyasətçinin sözlərinə görə, N.Paşinyan 5 il əvvəl həmsədrlərin bütün təkliflərini rədd edib:

“Bu sülh sazişində Qarabağın statusunun həlli məsələsinin gələcək nəsillərə saxlanılması, orada uzunmüddətli şəkildə sülhməramlıların yerləşdirilməsi nəzərdə tutulurdu. Lakin Nikol Paşinyan bunu qəbul etmədi. Həmçinin belə bir təklifin olduğunu xalqa açıqlamadı. 2020-ci ildə Qafanda keçirdiyi o məşhur mətbuat konfransında masada müzakirə üçün heç bir sənədin olmadığını dedi”.

“Biz 44 günlük müharibəyə hazır deyildik, indi də hazır deyilik. Baş nazir əvvəlcə Qərbin nizamlamasının qəbul ediləcəyini dedi, buna görə Rusiyanın nizamlamasına keçməkdən imtina etdi. Lakin o qərar da uğursuz oldu. Onun bütün hesablamaları fiasko ilə nəticələndi. Bu gün biz çox çətin vəziyyətdəyik. Cənubi Qafqazdakı məsələləri Azərbaycan və Türkiyə həll edir”, – L.Zurabyan bildirib.