Abbas Abbasov dənizaşırı ərazilərdəki qanunsuz həbslərdən danışdı

“Siyasi və qanunsuz həbslər təkcə Yeni Kaledoniyada deyil, digər dənizaşırı ərazilərdə də həyata keçirilir. Biz Bakı Təşəbbüs Qrupu (BTQ) olaraq siyasi məhbuslara dəstək göstəririk”.

Bunu Bakı Təşəbbüs Qrupunun “Müstəmləkəçilik: Milli-dini kimliyin silinməsi” mövzusunda beynəlxalq konfrans ərəfəsində təşkil etdiyi mətbuat konfransında BTQ-nin icraçı direktoru Abbas Abbasov bildirib.

“Yeni Kaledoniyada kolonializmlə bağlı faktlar son bir-iki ildə dünya ictimaiyyətinə məlum məsələ deyil. 80-ci illərdən bəri Fransa hökuməti ilə danışıqlar aparılır. Biz BTQ olaraq Fransa və Yeni Kaledoniya arasında danışıqlarda vasitəçi ola bilərik. Düşünürəm ki, bu ərazilərlə bağlı qanunsuz həbslərin, insan hüquqlarının pozulmasının qarşısı alınmalıdır. Biz beynəlxalq qeyri-hökumət təşkilatı olaraq bu danışıqlarda vasitəçi ola bilərik”, – deyə o qeyd edib.