ABŞ-nin Azərbaycandakı səfirliyi sorğuya cavab verməkdən boyun qaçırdı | Detallar açıqlandı

ABŞ-nin Azərbaycandakı səfirliyinin “Report” agentliyinin guya yanlış təəssürat yaradan məlumat yayması barədə “X” platformasında paylaşımı həqiqəti əks etdirmir.

Bu barədə agentlikdən bildirilib.

Səfirlik “X” platformasında vurğulayıb ki, “Report” ABŞ səfirliyinə Ermənistandan 1988-90-cı illərdə qovulmuş azərbaycanlıların Ermənistanda mədəni irsinin qorunması ilə bağlı sorğusuna cavabı dərc edilməyib.

Agentliyin yaydığı məlumatda qeyd olunub ki, məsələyə bir daha aydınlıq gətirmək məqsədilə bildirməyi özümüzə borc bilirik ki, ABŞ-nin Ermənistandakı səfirliyi Azərbaycanın Qarabağ bölgəsində erməni irsinin qorunması ilə bağlı qrant layihəsi elan edib.

“Report” agentliyi isə ABŞ-nin Azərbaycandakı səfirliyinə Ermənistandan 1988-90-cı illərdə qovulmuş azərbaycanlıların bu ölkədəki mədəni irsinin qorunması ilə bağlı hansı layihələrin həyata keçirilməsi ilə əlaqədar sual ünvanlayıb.

Səfirlik sorğuya Azərbaycanın işğaldan azad edilən ərazilərdə bundan sonra nə etmək istədikləri cavabını göndərib. Faktiki olaraq sorğuya mahiyyətcə cavab verilməyib.

Buna uyğun olaraq “Report” agentliyi məlumat paylaşıb, amma cavabı tam olaraq dərc etməyə lüzum görmür. Sualın Ermənistan, cavabın isə Azərbaycanın ərazisi haqqında olması səbəbindən ABŞ səfirliyinin məsələyə münasibəti adıçəkilən xəbərdə ümumi formada verilib.