ABŞ-nin demokratiya adı altında çevirdiyi oyunlar

Serbiyada keçirilən seçkilərin nəticələrinə etiraz olaraq paytaxt Belqradda kütləvi etiraz aksiyalarına start verilib.

Serbiya Prezidenti Aleksandr Vuçiçin hadisə ilə bağlı bəyanatında dəfələrlə “inqilab” sözünü təkrarlaması vəziyyətin çox ciddi olduğundan xəbər verir.

Görünən odur ki, Serbiyada baş verənlər Qərbin bu günə qədər bir çox ölkələrdə sınaqdan çıxardığı “rəngli inqilab” ssenarilərinin növbəti təcəssümüdür. Çünki Qərbin müstəqil siyasət yürüdən, onun diqtəsi ilə hərəkət etməyən ölkələrin hakimiyyətlərini zorakılıqla dəyişdirmək cəhdi ilk deyil. Görünür, Belqradda baş verənlər də sözügedən planın tərkib hissəsidir.

1989-cu ildə Çexoslovakiya və 2018-ci ildə Ermənistanda “Məxməri”, 2003-cü ildə Gürcüstanda “Qızılgül”, 2004-cü ildə Ukraynada “Narıncı”, 2010-cu ildə Tunisdən bütün ərəb ölkələrinə ixrac edilən “Ərəb baharı” inqilabları da məhz Qərbin imzası ilə baş tutub.

Amerika Birləşmiş Ştatları firavan və demokratik gələcək adı altında həmin region və ölkələri qan gölünə çevirib, məhv olmaq təhlükəsi ilə üz-üzə qoyub. İndi də Serbiya hakimiyyətinin müstəqil siyasət həyata keçirməsi Qərbin təzyiqli bəyanatlarının əməldə də nümayiş olunmasına gətirib çıxarıb.

Qeyd etmək yerinə düşər ki, Qərb uzun illər Azərbaycanı da ərazilərinin işğalı ilə barışmağa məcbur etmək istəyib, ölkəmizdə və regionda çevriliş planları qurub. Amma rəsmi Bakının qətiyyətli və prinsipial mövqeyi, o cümlədən uzaqgörən siyasəti dövlətimizə tuşlanan məkrli planların qarşısını alıb. Görünən isə odur ki, Qərb hələ də məkrli niyyətlərindən əl çəkmək istəmir.