Aİ-dən Ermənistana növbəti şillə

“Avropa İttifaqının Ermənistandakı monitorinq missiyası avqustun 15-də Ermənistan-Azərbaycan şərti sərhədində monitorinq zamanı eşidilən atəş səslərinin mənbəyini müəyyən edə bilməyib”.

Bu barədə Avropa İttifaqının Xarici siyasət və təhlükəsizlik məsələləri üzrə Ali komissarının mətbuat katibi Peter Stano bildirib.

“Avqustun 15-də Yuxarı Şorca kəndi yaxınlığında Aİ-nin Ermənistandakı Monitorinq Missiyası patrulun aparıldığı yerdən təxminən 1 kilometr məsafədə 4-5 atəş qeydə alıb. Lakin missiyanın yerləşdiyi istiqamət atəşin mənbəyini və hədəfini müəyyən etməyə imkan verməyib.

Patrul iştirakçıları özlərini atəşin hədəfi kimi görməsələr də, ehtiyat tədbiri olaraq ərazini tərk ediblər”, – deyə o vurğulayıb.

Maraqlıdır ki, Aİ-nin Ermənistandakı missiyasının “X” sosial şəbəkəsindəki rəsmi səhifəsində ilk olaraq Ermənistan Müdafiə Nazirliyinin iddialarının əksinə olaraq, patrulun atəşə tutulmadığı barədə paylaşım edilmişdi.

Lakin görünür, Ermənistan tərəfinin və onun Aİ-dəki havadarlarının fəal təzyiqi altında bu paylaşım başqası ilə əvəz edilib. Həmin paylaşımda isə qeyd edilib ki, atışma zamanı patrul xidməti həyata keçirilib, heç kəs xəsarət almayıb.