Aİ şərti sərhədə göndərdiyi mülki missiyanın sayını artırdı | məqsəd nədir?

Avropa İttifaqı Ermənistanla Azərbaycan arasındakı şərti sərhədə göndərdiyi mülki missiyasının sayını 50 faiz artırır.

Bu barədə İttifaqın ali nümayəndəsi Cozef Borrel xarici işlər nazirlərinin görüşünün yekunlarına dair mətbuat konfransında çıxış edərkən məlumat verib.

Bildirilib ki, təşkilat heyətin sayının 138-dən 209 nəfərə qədər artırılması barədə qərarı artıq qəbul edib.

Xatırladaq ki, 2022-ci ilin oktyabrında keçirilən Praqa görüşü zamanı liderlərin razılığı ilə yaradılan monitorinq missiyasının mandatı elə həmin ilin dekabrın 19-da başa çatıb.

Razılaşmaya əsasən, 40 nəfərdən ibarət mülki missiya iki ay ərzində fəaliyyət göstərməli idi. Amma bu müddət başa çatandan sonra Ermənistan və Avropa İttifaqı daha 100 nəfərdən ibarət yeni missiyanın iki il müddətinə göndərilməsi barədə razılığa gəlib. Bu ilin fevralında təşkilat yeni qərar qəbul etdi, apreldə isə heyət Ermənistana göndərildi.

Məlumat üçün bildirək ki, Aİ-nin növbəti missiyasının bölgəyə göndərilməsi ilə bağlı Azərbaycan tərəfi heç bir razılıq verməyib.