AXCP kimin çətiri altında fəaliyyət göstərib?

“Ramiz Mehdiyevin dövlətə xəyanət maddəsi ilə ittiham edilməsi bir sıra məsələləri ifşa etdi. Bəlli oldu ki, Azərbaycan Xalq Cəbhəsi Partiyasının (AXCP) sədri Əli Kərimli və Milli Şura Ramiz Mehdiyevin siyasi çətiri altında Azərbaycandakı legitim hakimiyyəti qəsb etməyə cəhd göstəriblər”.

Bu sözləri millət vəkili Hikmət Babaoğlu deyib.

O bildirib ki, hazırda postsovet məkanında baş verən hadisələr kontekstində yeni təhlükəsizlik tədbirləri zərurəti yaranır:

“Rusiya Ukraynada müharibəni bitirəndən sonra dərhal “ənənəvi” hesab etdiyi coğrafiyalarda imperialist maraqlarını diktə etməyə çalışacaq və indi buna hazırlıq gedir. Bu işdə daxilimizdəki imperiya maraqlarına xidmət edən qüvvələrin fəaliyyətini koordinasiya edən Ramiz Mehdiyevdir. Bu fəaliyyət üçün radikal dağıdıcı ünsürlər təşkil edərək onları siyasi baxımdan təşkilatlandıran da AXCP-nin sədri Əli Kərimlidir.

Əgər biz indi Əli Kərimlinin, eləcə də Ramiz Mehdiyevin dövlətin içinə sızan dağıdıcı komandasını ifşa etməsək və onlar Azərbaycanın milli iradəsi qarşısında cavab verməsələr, ölkənin legitim hakimiyyətini devirməyə çalışacaqlar”.