Ayxan Hacızadədən Fransanın əsassız ittihamlarına sərt cavab

Fransanın daxili işlər naziri Jerald Darmanin mayın 16-da “France-2” telekanalına müsahibəsində Azərbaycana qarşı bəzi ittihamlar səsləndirib.

Rəsmi Bakının Fransaya cavabı gecikməyib. Xarici İşlər Nazirliyinin Mətbuat Xidmətinin rəhbəri Ayxan Hacızadə bildirib ki, rəsmi Paris bu açıqlamalara görə üzr istəməlidir.

“Fransa tərəfindən Azərbaycana qarşı səslənmiş bu kimi fikirlər tamamilə qəbuledilməzdir və tərəfimizdən qətiyyətlə rədd edilir. İnsan hüquqlarının kobud şəkildə pozulduğu, baş verən iğtişaşlar zamanı aksiyaçıların öldürüldüyü, islamofobia və müsəlmanlara qarşı hücum hallarının, eləcə də antisemitizmin geniş yayıldığı Fransadan fərqli olaraq Azərbaycanda fundamental hüquq və azadlıqlar tam olaraq təmin edilir.

Azərbaycan müstəqilliyini bərpa edəndən etibarən daim demokratik dəyərlərə sadiq cəmiyyət kimi formalaşıb və inkişaf edib. Azərbaycan müxtəlif etnik və dini mənsubiyyətə mənsub insanların mehriban və təhlükəsiz şəraitdə yaşadığı ölkədir. Fransa tərəfi bu açıqlamaya görə üzr istəməlidir. Əks təqdirdə bu, Azərbaycan-Fransa münasibətlərinin daha da pisləşməsinə gətirib çıxaracaq”, – deyə Ayxan Hacızadə bildirib.