Azərbaycan daha kimləri həbs edəcək? - Erməni nəşri nə yazdı?

Sentyabr ayından Bakıdakı istintaq təcridxanasında saxlanılan qondarma rejimin 8 “hərbi və siyasi lideri”nin ilkin həbs müddəti gələn ay başa çatacaq.

Bu barədə “Hraparak” məlumat yayıb.

Erməni nəşri yazır ki, yanvarın 28-də keçmiş “dövlət naziri” Ruben Vardanyanın, yanvarın 30-da isə Davit Babayanın həbs müddəti başa çatacaq.

Qəzet onu da əlavə edib ki, “sabiq prezidentlər” – Bako Saakyan, Arkadi Qukasyan və Araik Arutyunyanın həbsdə saxlanma müddəti isə fevralın 3-də başa çatır. Onlar ilkin istintaq dövrü üçün 4 ay həbsdə saxlanılıblar.

Nəşr bununla bağlı əlavə edib ki, erməni cəmiyyətində müəyyən ümidlər var ki, separatçı “liderlər”in həbs müddəti bitən kimi azadlığa buraxılacaqlar.

Separatçıların hüquqlarını təmsil edən erməni hüquq müdafiəçisi Siranuş Saakyan isə açıqlamasında bildirib ki, Azərbaycan hökumətinin qondarma rejim ünsürləri ilə bağlı növbəti mərhələdə hansı addımlar atacağı hələ ki bəlli deyil.

Nəşr qeyd edib ki, Azərbaycan Prezidenti İlham Əliyevin son müsahibəsinə əsasən, qondarma Artsaxın “hərbi və siyasi liderləri”nin bundan sonra da həbsdə qalması ehtimalı yüksəkdir. Üstəlik, Azərbaycan tərəfi daha 2 nəfəri – Ermənistanın sabiq prezidentləri – Serj Sarkisyan və Robert Köçəryanı həbs etmək istədiyini də dilə gətirib.