Azərbaycan əsas oyunçu kimi yüksəlir | Erməni ekspertlərdən Rusiya barədə gözlənilməz şərh

“Rusiya-Azərbaycan münasibətlərində yaranmış son böhran, əslində, göründüyü qədər dərin deyil və müvəqqəti xarakter daşıyır”.

Bunu erməni ekspert Armine Adibekyan Rusiya-Azərbaycan arasında yaranmış son prosesləri şərh edərkən deyib.

“Bakının hətta İran səfirliyinə hücumu zamanı Azərbaycan-İran münasibətlərindəki böhranı xatırlatmaq kifayətdir. Lakin bir müddət sonra tərəflər kompromis tapdılar və münaqişə həll olundu. İran-Azərbaycan münasibətləri Rusiya-Azərbaycan münasibətlərindən qat-qat dərin və mürəkkəbdir. Amma baş verən böhranlar nəticədə dövlətlərarası münasibətlərə təsir etməyib”, – o qeyd edib.

Adibekyan hesab edir ki, Azərbaycan xarici oyunçulardan daha çox müstəqillik əldə edib onların təsirini azaltmağa çalışır.

“Rusiyanın təsiri zəifləyəndə Rusiya-Azərbaycan rəsmi münasibətləri praqmatik xarakter alacaq. Bununla belə, əlaqələrin kəsilməsindən söhbət getmir. Belə addımlarla Azərbaycan ancaq mövqelərini möhkəmləndirir. Rusiya Azərbaycana qarşı Ermənistanın xeyrinə kəskin addımlar atmayacaq. Son 30 ildə Rusiyanın belə böhranlardan Azərbaycan tərəfinə qarşıdurma üçün bəhanə kimi istifadə etdiyi elə bir hadisəni xatırlamıram. Hazırda Moskvanın Bakıya ehtiyacı olduğu kimi, Bakının da Moskvaya ehtiyacı var. Bu isə o deməkdir ki, onların münasibətlərində kəskin dəyişiklik olmayacaq. Rusiya üçün Ermənistan heç bir halda alternativ olmayacaq”, – ekspert qeyd edib.

Ermənistana gəldikdə, Adibekyan deyib ki, problemlərini onların əvəzinə heç kim həll etməyəcək: “Özümüzdən başqa heç kim bizim yaxşı, təhlükəsiz yaşamağımızda, perspektivli gələcəyimizdə maraqlı deyil”.

Politoloq Yervand Bozoyan isə hesab edir ki, Azərbaycan Qərblə Rusiya arasında balanslaşdırılmış siyasət yeritməyə çalışır: “Nəticədə Əliyev regionda öz rolunu gücləndirir və Azərbaycanın əsas oyunçu kimi statusunu yüksəldir. O həmçinin Rusiyanın müxtəlif məsələlərdə güzəştə getməsini gözləyir”.