Azərbaycan etibarlı enerji tərəfdaşı kimi mövqeyini gücləndirir | Prezident açıqlama verdi

“Energetika hər bir ölkənin milli təhlükəsizlik məsələsidir”.

Bunu Prezident İlham Əliyev “8 Noyabr” Elektrik Stansiyasının açılış mərasimində çıxışı zamanı bildirib.

Dövlət başçısı qeyd edib ki, bu gün dünyada, xüsusilə Avropa məkanında enerji xətlərinin təhlükə altında olması böyük fəsadlara yol açır və hər kəs bunun şahididir.

“Bu gün Azərbaycan Avropanın enerji təhlükəsizliyini təmin edən ölkələr sırasındadır. Təsadüfi deyil ki, Avropa İttifaqı Azərbaycanı etibarlı tərəfdaş və Pan-Avropa qaz təchizatçısı adlandırır”, – deyə Prezident vurğulayıb.

Onun sözlərinə görə, hazırda Azərbaycan qazı 12 ölkəyə ixrac olunur, onlardan 10-u Avropa ölkəsidir:

“Qaz təchizatının coğrafi əhatəsinə görə Azərbaycan bu gün dünya miqyasında qabaqcıl yerlərdə qərarlaşıb”.

İlham Əliyev əlavə edib ki, Azərbaycan təbii qaz, xam neft, neft və neft-kimya məhsulları, eləcə də müəyyən həcmdə elektrik enerjisi ixrac edir:

“Gələcəkdə istismara veriləcək layihələr sayəsində ölkəmiz müxtəlif elektrik kabelləri vasitəsilə yaşıl enerjini də ixrac edəcək. Beləliklə, Azərbaycanın iqtisadi gücü və geosiyasi önəmi daha da artacaq, ölkəmiz bölgədə sabitlik, inkişaf və tərəqqi məkanı kimi mövqeyini möhkəmləndirəcək”.