Azərbaycan həbs edilmiş tələbəmizlə bağlı İrana nota verdi

Fərid Səfərli barədə məlumat Xarici İşlər Nazirliyinə daxil olan gündən, yəni martın 9-dan etibarən vətəndaşın aqibətinin müəyyən edilməsi və İran tərəfindən məsələyə aydınlıq gətirilməsi məqsədilə müvafiq olaraq İranın ölkəmizdəki Səfirliyinə nota ünvanlanıb.

Bu barədə XİN-in mətbuat xidməti idarəsinin rəisi Ayxan Hacızadə azərbaycanlı tələbənin İranda həbs olunması ilə bağlı yerli medianın sualına cavabında bildirib.

“Tərəfimizdən edilən çoxsaylı müraciətlərdən sonra İran tərəfi notamıza cavab olaraq Fərid Səfərlinin həbs olunaraq ona qarşı cinayət işi başladıldığını bildirib. Bu barədə onun ailəsinə müvafiq məlumat verilib. Məlum terror hadisəsi ilə bağlı Azərbaycanın İrandakı diplomatik təmsilçiliyinin məhdud olmasına baxmayaraq, F.Səfərli barədə məlumat verildiyi ilk gündən etibarən həm XİN, həm də Təbrizdəki Baş Konsulluğumuz tərəfindən İranın aidiyyəti qurumları ilə müzakirələr aparılır.

Bununla yanaşı, F.Səfərlinin ailəsi və özü ilə mütəmadi əlaqə saxlanılır. Yaxın zamanlarda Təbrizdəki Baş Konsulluğumuz tərəfindən F.Səfərli ilə görüşün keçirilməsi üçün tədbirlər görülür”, – deyə nazirlik rəsmisi qeyd edib.