Azərbaycan-NATO əlaqələrinin strateji önəmi | Hərbi əməkdaşlığın müzakirəsi

NATO-nun Brunssum Birgə Qüvvələr Komandanlığının Qərargah rəisinin Dəstək üzrə müavini general-mayor Stefan Fiksin rəhbərlik etdiyi nümayəndə heyəti Azərbaycana səfər edib.

Bu barədə Müdafiə Nazirliyi məlumat yayıb.

Hərbi Dəniz Qüvvələrində keçirilən görüşdə NATO-nun tərəfdaşlıq proqramları çərçivəsində Azərbaycanla əməkdaşlığın cari vəziyyəti və gələcək perspektivləri, o cümlədən təcrübə mübadiləsinin dərinləşdirilməsi imkanları müzakirə olunub.

Tərəflər NATO-nun tərəfdaşlıq proqramları kontekstində Azərbaycanın fəal iştirakını və göstərdiyi təşəbbüsləri xüsusi vurğulayıb.

Görüşdən sonra Hərbi Dəniz Qüvvələrinin "N" saylı hərbi hissəsində qonaqlara hərbi hissənin fəaliyyət istiqamətləri, hərbi qulluqçuların taktiki və xüsusi hazırlıqları ilə bağlı məlumat verilib.

Daha sonra NATO nümayəndələri Hərbi Polis İdarəsini ziyarət edib. Görüş çərçivəsində qonaqlara hərbi polisin yaradılması, fəaliyyəti, idarənin strukturu ilə bağlı brifinq təqdim edilib.

Qonaqlar Beynəlxalq Hərbi Əməkdaşlıq İdarəsində də olub. İdarədə təşkil edilən görüşdə Azərbaycan və NATO arasında hərbi sahədə əməkdaşlığın cari vəziyyəti, tərəfdaşlıq çərçivəsində icra olunan layihələr və qarşılıqlı maraq doğuran istiqamətlər ətrafında geniş və məhsuldar fikir mübadiləsi aparılıb, həmçinin gələcək əməkdaşlıq perspektivləri müzakirə olunub.

Bu səfərlərin Azərbaycan-NATO əməkdaşlığının strateji əhəmiyyətini bir daha təsdiq etdiyi və qarşılıqlı anlaşma mühitinin daha da möhkəmləndirilməsinə töhfə verdiyi vurğulanıb.