Azərbaycan, Türkiyə və Pakistan XİN başçıları nələri muzakirə etdilər?

Xarici işlər naziri Ceyhun Bayramovla türkiyəli həmkarı Hakan Fidan, eləcə də Pakistan Baş nazirinin müavini və xarici işlər naziri Məhəmməd İshaq Dar telefon danışığı aparıb.

Azərbaycan və Türkiyə Xarici İşlər Nazirliyinin başçıları Yaxın Şərqdəki vəziyyəti müzakirə ediblər.

Telefon danışığı zamanı Qəzza üzrə razılaşmadan irəli gələn məsələlər daxil olmaqla Türkiyənin bu əhəmiyyətli razılıqda oynadığı uğurlu vasitəçilik səyləri təqdir olunub.

Nazirlər həmçinin qarşılıqlı maraq doğuran ikitərəfli və regional məsələlər ətrafında fikir mübadiləsi aparıblar. Azərbaycan və Pakistan XİN başçılarının telefon danışığında isə Yaxın Şərqdəki vəziyyət müzakirə edilib.

Bu barədə Pakistan Xarici İşlər Nazirliyi öz "X" hesabında paylaşım edib.

Paylaşımda bildirilib ki, nazirlər Qəzza zolağındakı humanitar böhranı müzakirə ediblər. Onlar həmçinin ərəb-islam ölkələrinin regionda sülh və sabitliyin təşviqi istiqamətində daha geniş səyləri, eləcə də Misirin Şarm əl-Şeyx şəhərində keçiriləcək sammitlə bağlı fikir mübadiləsi aparıblar.