Azərbaycan üçün ən önəmli məqam budur | Ceyhun Bayramov

“Sülh müqaviləsi ətrafında danışıqlar prosesinə gəldikdə isə deyim ki, fevral ayından etibarən intensiv danışıqlar bərpa edilib”.

Bu fikirləri Azərbaycanın xarici işlər naziri Ceyhun Bayramov ATƏT-in fəaliyyətdə olan sədri İan Borqla birgə mətbuat konfransında deyib.

“Buna qədər əvvəlki müddətdə sənədlərin və şərtlərin mübadiləsi baş verirdi, sadəcə fiziki görüşlər dayandırılmışdı. Amma Münhen, Berlin və Almatı görüşləri ilə proses davam etdirildi. Son görüş nəticəsində xeyli müzakirə aparıldı. Mən bununla bağlı detallara varmaq istəməsəm də, bu danışıqları müsbət qiymətləndirirəm”, – o bildirib.

XİN rəhbəri onu da qeyd edib ki, gözləntilər uyğun və realist olmalıdır:

"Bu, olduqca mürəkkəb və lazımlı prosesdir. Sülh sazişi Azərbaycan tərəfi üçün ədalətli və beynəlxalq hüquqa əsaslanan, gələcəkdə hansısa şübhəli məqamları masa üzərinə gətirmək məqamlarını istisna edən saziş olmalıdır. Eləcə də qarşı tərəfin də gözləntilərini nəzərə alır, qarşılıqlı həll yolları üçün çalışırıq".