Azərbaycan və Qazaxıstan arasındakı əməkdaşlıqla bağlı yeni məlumatlar

Ötən ilin yekunlarına əsasən, Azərbaycan və Qazaxıstan arasında qarşılıqlı ticarətin həcmi təqribən 500 milyon ABŞ dolları təşkil edib.

Bu barədə Azərbaycanın Baş naziri Əli Əsədovla Bakıda rəsmi səfərdə olan Qazaxıstanın Baş naziri Oljas Bektenov arasında baş tutan geniştərkibli görüşdə məlumat verilib.

Tərəflər iki ölkə arasında 2024-cü ilin sonuna 21 faiz təşkil edən tranzit yükdaşımaların həcminin artımından məmnunluq ifadə ediblər.

Qeyd olunub ki, dəmir yolu ilə tranzit daşımaları 33 faiz artıb.

Görüşdə Azərbaycan tərəfi öz gəmiqayırma imkanlarını Qazaxıstana təklif etməyə hazır olduğunu bildirib.

Baş Nazir Əli Əsədov qeyd edib ki, Azərbaycan iqlim gündəliyinin təbliğinə xüsusi əhəmiyyət verir və COP29 konfransı bunun bariz nümunəsi olub. O, Xəzər dənizinin dayazlaşması problemindən Azərbaycan tərəfinin ciddi narahatlığını dilə gətirib və bu istiqamətdə birgə tədbirlərin görülməsini dəstəkləyən addımlar atdığına görə Qazaxıstan tərəfinə minnətdarlığını bildirib.

Tərəflər təhsil, elm, səhiyyə və idman sahələrində mübadilələrin uğurla həyata keçirildiyini qeyd ediblər.

Söhbət zamanı qarşılıqlı turist axınının artım dinamikası müsbət qiymətləndirilib. Daha sonra icbari tibbi sığorta sahəsində əməkdaşlığa, elmi nəşrlərin siyahısının formalaşdırılmasına, Xəzər dənizinin dibi ilə fiber-optik rabitə xətlərinin çəkilməsi haqqında Sazişin təsdiqinə dair sənədlər imzalanıb.