Azərbaycan və Qazaxıstan XİN-ləri birgə Fəaliyyət Planı imzaladı

Astanada Azərbaycan və Qazaxıstanın xarici işlər nazirlikləri arasında Fəaliyyət Planı imzalanıb.

Sənəd Azərbaycan xarici işlər naziri Ceyhun Bayramov və qazaxıstanlı həmkarı Murat Nurtleunun genişləndirilmiş tərkibdəki görüşünün yekunları üzrə imzalanıb.

Görüşdən sonra media qarşısına çıxan xarici işlər nazirləri ikitərəfli münasibətlərdən razılıq ifadə ediblər.

Murat Nurtleu Qazaxıstanın Azərbaycanın Asiyada Qarşılıqlı Fəaliyyət və Etimad Tədbirləri üzrə Müşavirədə sədrlik prioritetlərini dəstəklədiyini bildirib.

O qeyd edib ki, Qazaxıstanın təşəbbüsü ilə yaradılmış bu forum regional təhlükəsizliyin və əməkdaşlığın gücləndirilməsi üçün zəruri olan dialoq platformasına çevrilib.

Nurtleu həmçinin vurğulayıb ki, Qazaxıstan bu forumun beynəlxalq təşkilata çevrilməsi istiqamətində birgə işi davam etdirməyə hazırdır.

O həmçinin Almatıda Mərkəzi Asiya və Əfqanıstan üçün Dayanıqlı İnkişaf Məqsədləri üzrə BMT-nin regional mərkəzinin yaradılması haqqında BMT Baş Assambleyasının qətnaməsini dəstəklədiyinə görə Azərbaycana təşəkkürünü bildirib. Bu qətnaməyə 152 ölkə qoşulub.