Azərbaycan Xənkəndidəki vətəndaşlarına yardımı hansı yolla aparacaq?

İyunun 15-də Laçın sərhəd-buraxılış məntəqəsinin atəşə tutulması ilə yanaşı, erməni əsilli sürücülərin Beynəlxalq Qızıl Xaç Komitəsinə məxsus nəqliyyat vasitələrində qaçaqmalçılıq məhsullarını Azərbaycana gətirmək səyləri Ermənistanın suverenliyimizə müdaxilə edən cəhdlərdən və qeyri-qanuni fəaliyyətlərdən əl çəkmək niyyətinin olmadığını göstərir.

Bunu xarici işlər naziri Ceyhun Bayramov BQXK-nin Azərbaycandakı nümayəndəliyinin rəhbəri Draqana Kojiçlə görüşdə deyib.

Nazir komitənin iyulun 11-də yaydığı açıqlamada bəyan edilməmiş məhsulların keçirilməsi fəaliyyətlərini dəstəkləmədiyini diqqətə çatdırmasının və belə yükləri daşıyan nəqliyyat vasitələrinin sürücülərinin xidməti müqavilələrinə xitam verilməsinin qeydə alındığını və təqdirəlayiq olduğunu bildirib. Ceyhun Bayramov gələcəkdə bu kimi halların qarşısının alınmasının zəruri olduğunu vurğulayıb.

Bundan əlavə, görüş zamanı Azərbaycanla BQXK arasında əməkdaşlıq və komitənin Azərbaycanın Xankəndi şəhərində fəaliyyəti məsələləri müzakirə olunub.

Nazir Ceyhun Bayramov zəruri qaydalara riayət etməklə, BQXK-nin vasitəsilə erməni sakinlərin tibbi məqsədlər üçün sərhəd məntəqəsindən keçidinin davam etməsinin mümkünlüyünü bildirib.

Erməni sakinlərin tədarük ehtiyaclarına gəldikdə, Azərbaycan tərəfinin Ağdam-Xankəndi yolundan istifadə etməklə yardım göstərmək imkanının mövcud olduğunu bir daha xatırladıb. Görüş zamanı həmçinin digər qarşılıqlı maraq doğuran məsələlər ətrafında fikir mübadiləsi aparılıb.