Azərbaycan XİN-dən Bakının azad edilməsi ilə bağlı paylaşım

Sentyabrın 15-i Bakının işğalçı erməni–bolşevik birləşmələrindən azad olunmasının ildönümüdür.

Azərbaycan xalqına aid ən şərəfli tarixlərdən biri – 15 sentyabr 1918-ci il tarixinin yazılmasında Nuru paşanın rəhbərlik etdiyi Qafqaz İslam Ordusunun xüsusi rolu olub. Bu ordu Bakının erməni–bolşevik birləşmələrindən azad edilməsində böyük şücaətlər göstərib. Onun tərkibində vuruşan yüzlərlə türk əsgəri şəhidlik zirvəsinə yüksəlib.

Bu günlə əlaqədar Azərbaycan Xarici İşlər Nazirliyi də paylaşım edib. Bildirilib ki, Bakının azad edilməsi Azərbaycanın dövlətçilik uğrunda mübarizəsində dönüş nöqtəsi oldu.

"1918-ci ilin bu günündə Azərbaycan korpusunu da özündə birləşdirən Qafqaz İslam Ordusu Bakıya daxil olaraq erməni–daşnak işğalına son qoydu. Paytaxtın azad edilməsi Azərbaycanın dövlətçilik uğrunda mübarizəsində dönüş nöqtəsi oldu və xalqımızın, həmçinin onların müttəfiqlərinin birliyini, cəsarətini və fədakarlığını nümayiş etdirdi. 107 il sonra biz Vətənimizin azadlığı və müstəqilliyi uğrunda canlarını fəda edənlərin xatirəsini dərin minnətdarlıqla yad edirik", – deyə paylaşımda qeyd olunub.