Azərbaycan XİN Qriqoryana cavab verdi

Xarici İşlər Nazirliyi Ermənistanın Təhlükəsizlik Şurasının katibi Armen Qriqoryanın Minskdə Kollektiv Təhlükəsizlik Müqaviləsi Təşkilatının iclası zamanı səsləndirdiyi iddialara cavab verib. Bildirilib ki, Ermənistanın Azərbaycana qarşı irəli sürdüyü əsassız ittihamları bu ölkənin növbəti manipulyasiyasıdır.

Qeyd edilib ki, Ermənistan tərəfinin öz üzərinə götürdüyü öhdəlikləri yerinə yetirmək, eləcə də Azərbaycanın ərazi bütövlüyü və suverenliyinə hörmət etmək əvəzinə erməni sakinlərin reinteqrasiyası kimi daxili məsələlərə müdaxilə cəhdlərinə hələ də son qoymaması bu ölkənin bölgədə sülh və sabitlikdə maraqlı olmadığını göstərir:

“Ermənistan Təhlükəsizlik Şurasının katibinə xatırladırıq ki, Ermənistan üçtərəfli bəyanat çərçivəsində öhdəliklərinə zidd olaraq erməni silahlı qüvvələrini Azərbaycan ərazisindən tam olaraq hələ də çıxarmayıb və bu qüvvələrin Azərbaycan ərazisində mövcudluğu beynəlxalq hüququn bütün norma və prinsiplərinin pozuntusu olmaqla yanaşı, ciddi təhdid mənbəyidir”.

Nazirlik həmçinin rəsmi İrəvanı bölgədə sülh və təhlükəsizliyin təmin olunmasına xələl gətirən cəfəng ritorikadan çəkinməyə, əsassız yerə Azərbaycanı ittiham etməməyə, beynəlxalq ictimaiyyətin diqqətini yayındırmaq cəhdlərini davam etdirmək əvəzinə, üzərinə götürdüyü öhdəlikləri yerinə yetirməyə çağırıb.