Azərbaycan XİN Ümumxalq Hüzn Günü ilə bağlı anım tədbiri təşkil edib

Azərbaycan Xarici İşlər Nazirliyi Bakıdakı diplomatik nümayəndəliklər üçün 20 Yanvar Ümumxalq Hüzn Günü anım tədbiri təşkil edib.

Bu barədə diplomatik nümayəndəliklərin sosial şəbəkə hesablarında paylaşımlar edilib.

Türkiyənin Azərbaycandakı səfirliyinin paylaşımında qeyd edilib ki, səfir Cahit Bağçı və digər ölkələrin diplomatları 20 Yanvar – Ümumxalq Hüzn Günü ilə əlaqədar Şəhidlər xiyabanını ziyarət ediblər.

“Faciənin 35-ci ildönümündə şəhid azərbaycanlı qardaşlarımızı bir daha anırıq”, – deyə Türkiyə səfirliyinin paylaşımında bildirilib.

Avropa İttifaqının (Aİ) Azərbaycandakı nümayəndəliyinin paylaşımında bildirilib ki, səfir Peter Mixalko və Avropa İttifaqına üzv ölkələrin səfirləri 20 Yanvar qurbanlarının xatirəsini hüznlə yad etmək üçün Bakıda Şəhidlər xiyabanına gül dəstələri düzüblər.

Almaniyanın Azərbaycandakı fövqəladə və səlahiyyətli səfiri Ralf Horlemann Şəhidlər xiyabanında 20 Yanvar faciəsi qurbanlarının xatirəsini ehtiramla yad edib. Bu barədə səfir “X” hesabında paylaşım edib.

“1990-cı il yanvarın 19-u və 20-si Bakıda həlak olanların əziz xatirəsini hörmətlə anırıq. Sovet İttifaqının dağılması zamanı yaranan qarışıqlıqdan demək olar ki, heç bir region Cənubi Qafqaz, o cümlədən Azərbaycan qədər çox əziyyət çəkməyib”, – deyə o qeyd edib.