Bakı və İrəvan arasında yeni proses başlayır? - Paşinyandan diqqətçəkən açıqlama

“Sülh sazişi ilə bağlı danışıqların iki komponenti var. Birincisi, fiziki görüşlərdir. Bu, danışıqlar prosesinin önəmli komponentidir. Fiziki görüşlər dekabr ayından əvvəl birmənalı mümkün deyil. Fiziki görüşlərdən başqa, Azərbaycanla Ermənistan arasında layihələrin mübadiləsi həyata keçirilir. Yəni sənəd üzərində iş davam edir”.

Bakıda keçirilən COP29 iqlim konfransının 5-ci günü Azərbaycanın xarici işlər naziri Ceyhun Bayramov jurnalistlərin danışıqlar prosesi ilə bağlı ona ünvanladığı suallara belə cavab verib.

Fikirlərdən aydın olur ki, o zaman bütün diqqətlər COP tədbirinə yönəlsə də, eyni zamanda paralel olaraq iki ölkə arasında diplomatik təmaslar, danışıqlar davam edib.

Elə bir müddət öncə Prezidentin köməkçisi Hikmət Hacıyev də bildirib ki, Ermənistan tərəfi sülh müqaviləsinin mətni ilə bağlı Azərbaycanın təkliflərinə vaxtında cavab vermədiyi üçün ekspertlər səviyyəsində müzakirələr və danışıqlar davam edir. Buna görə də hazırda həmin kontekstdə proses ləngiyir. Prezidentin köməkçisi qeyd edib ki, böyük ehtimalla, dekabr ayında artıq yeni proses olacaq.

Maraqlıdır, danışıqların növbəti mərhələsi kimi dekabr ayı bizi nə gözləyir? İlin son ayında ikitərəfli fiziki görüşlərin baş tutması və hansısa sənədin imzalanması mümkün ola bilərmi?