Bakı və İrəvan arasındakı razılaşmanı həzm edə bilmirlər | Badalyan sərt danışdı
“Fransa hələ də Ermənistan-Azərbaycan razılaşması ilə bağlı susmaqda davam edir. Yeri gəlmişkən, Yunanıstanda da susqunluq var. Qəribə deyilmi ki, hətta Sloveniya Xarici İşlər Nazirliyi də Bakı və İrəvanı alqışlayır, təbrik edir, Fransa və Yunanıstan isə susur? Axı “X”də bir-iki sətir yazmaq niyə çətin olsun ki? Əlbəttə, yazmaq çətin deyil, amma bəlkə də, öz maraqlarına zidd yazmaq çətindir”.
Bunu erməni politoloq Akop Badalyan deyib.
“Yadınızdadır, Vaşinqton danışıqlarının ikinci – iyun raundundan sonra “Daşnaksütyun”un Fransa strukturu Emmanuel Makronun İrəvanın maraqlarını çox vaxt Nikol Paşinyandan daha səylə müdafiə etdiyini yaymışdı? Dərhal cavab verildi ki, bu, “Daşnaksütyun” tərəfindən yayılan dezinformasiyadır, baxmayaraq ki, Yelisey sarayı heç vaxt E.Makronun bu sözləri dediyini rəsmən inkar etmədi.
Bir neçə həftə əvvəl İlham Əliyev demişdi ki, Fransa Azərbaycanla regionda liderlik uğrunda mübarizə aparır və bu gün hətta bəyan edir ki, bizim vasitəçiyə ehtiyacımız yoxdur, aramızda razılaşma var.
Bunun hərfi mənası nə deməkdir? Bu o deməkdir ki, mən artıq bu regionda elə səviyyəyə gəlib çatmışam ki, siz ancaq qlobal məsələlərlə məşğul olub mənimlə danışmalısınız. Ermənistan-Azərbaycan məsələsi isə artıq tamamilə mənim çəki kateqoriyamdadır”, – o bildirib.