Bakıda Beynəlxalq Mülki Müdafiə Təşkilatının İcraiyyə Şurasının 58-ci sessiyası keçirilir

Bakıda Beynəlxalq Mülki Müdafiə Təşkilatının İcraiyyə Şurasının 58-ci sessiyası öz işinə başlayıb.

Sessiyada Təşkilata üzv ölkələrin fövqəladə halların idarə edilməsinə məsul qurumlarının rəhbər şəxsləri iştirak ediblər.

Bu barədə Fövqəladə Hallar Nazirliyindən məlumat verilib.

Fövqəladə hallar naziri general-polkovnik Kəmaləddin Heydərov sessiya iştirakçılarını salamlayaraq açılış nitqi ilə çıxış edib.

Nazir Prezident İlham Əliyevin rəhbərliyi altında dinamik inkişaf edən ölkəmizin son illər bir çox beynəlxalq səviyyəli nüfuzlu tədbirlərə ev sahibliyi etdiyini, BMMT-nin İcraiyyə Şurasının sessiyasının belə mötəbər tədbirlərdən biri olduğunu vurğulayıb.

Kəmaləddin Heydərov ölkəmizin fövqəladə halların qarşısının alınması və nəticələrinin aradan qaldırılması sahəsində beynəlxalq əməkdaşlığın inkişafına böyük əhəmiyyət verdiyini bildirərək, Beynəlxalq Mülki Müdafiə Təşkilatının fəlakətlərlə mübarizədə qlobal və əlaqələndirilmiş fəaliyyətin təşkili baxımından əhəmiyyətini vurğulayıb.

Qeyd edək ki, BMMT-nin İcraiyyə Şurasının 58-ci sessiyası iyulun 9-na kimi davam edəcək. Tədbir çərçivəsində təşkilatın maliyyə və inzibati hesabatlarının, inkişaf strategiyasının təqdimatı əsasında ortamüddətli inkişaf prioritetləri, məqsədləri və fəaliyyət sahələrinin, beynəlxalq əməkdaşlığı gücləndirmək üçün tədbirlər planının müzakirəsi nəzərdə tutulub. O cümlədən müvafiq qərarların qəbul olunması, 2027-ci il Ümumdünya Mülki Müdafiə Gününün mövzusunun müəyyənləşdirilməsi planlaşdırılır.