Bakıda saxlanılan fransalı Martin Rayanla bağlı qərar verildi

Bakıda casusluqda ittiham olunan Fransa vətəndaşı Martin Rayanın barəsində həbs qətimkan müddətinin uzadılması ilə bağlı Dövlət Təhlükəsizliyi Xidmətinin İstintaq baş idarəsinin vəsatətinə baxılıb.

Səbail Rayon Məhkəməsində keçirilən prosesdə vəsatət təmin edilib və Martin Rayanın barəsində həbs müddəti daha 4 ay uzadılıb.

Qeyd edək ki, Martin Rayan ötən il dekabrın 4-də Dövlət Təhlükəsizliyi Xidmətinin əməkdaşları tərəfindən Bakıda saxlanılıb. Cinayət işi üzrə aparılan araşdırmalar nəticəsində Fransa Səfirliyinin iki əməkdaşı diplomatik statuslarına uyğun olmayan və “Diplomatik əlaqələr haqqında” 1961-ci il Vyana Konvensiyası ilə ziddiyyət təşkil edən fəaliyyətlərinə görə “persona-non-grata” elan olunaraq ölkəni tərk edib.

İş üzrə Fransa kəşfiyyatının geniş casus şəbəkəsi, o cümlədən mötəbər beynəlxalq təşkilatlara nüfuz etdirilmiş nümayəndələri ifşa olunub. Fransa xüsusi xidmət orqanlarına qarşı qalmaqalı böyüyən işlə bağlı bir neçə gün əvvəl “Frans Press” agentliyinə açıqlama verən Martin Rayanın atası Riçard Rayan baş verənlərdə Fransa kəşfiyyatını günahlandırıb.