Baş nazir Əli Əsədovla Mixail Mişustin arasında görüş keçirilib

Martın 5-də Bakıda Baş nazir Əli Əsədovla ölkəmizdə səfərdə olan rusiyalı həmkarı Mixail Mişustin arasında əvvəlcə təkbətək, daha sonra isə geniş formatda görüş keçirilib.

Görüşdə iqtisadi-ticari əməkdaşlığın ardıcıl inkişafının əhəmiyyəti vurğulanıb, 2023-cü ildə qarşılıqlı ticarətdən əldə olunmuş 4,3 milyard dollar həcmində rekord səviyyədən məmnunluq ifadə edilib.

Sənaye kooperasiyası, o cümlədən Azərbaycanda yük, kommersiya avtomobillərinin istehsalı və yığılması, əczaçılıq preparatlarının istehsalı üzrə birgə layihələrin uğurla həyata keçirilməsinin yüksək dinamikası vurğulanıb.

Nəqliyyat-tranzit sahəsi Azərbaycan-Rusiya əməkdaşlığının əsas istiqaməti kimi qiymətləndirilib. 2023-cü ilin yekunlarına görə, Azərbaycanla Rusiya arasında yük daşımalarının həcmi 11 faizdən çox artıb.

Tərəflər Şimal-Cənub Beynəlxalq Nəqliyyat Dəhlizinin əhəmiyyətini qeyd ediblər, bu dəhlizin tam gücünə çatdırılması üzrə birgə səyləri alqışlayıblar.

Görüşün yekunlarına dair turizm və mədəniyyət, həmçinin Azərbaycan-Rusiya dövlət sərhədindən keçid məntəqələrinin və avtomobil yolu infrastrukturunun inkişafına dair ikitərəfli əməkdaşlığın gücləndirilməsi üzrə bir sıra sənədlər imzalanıb.