Baş nazir qurum rəhbərləri ilə mühüm iclas keçirdi | Nələr müzakirə edildi?

Nazirlər Kabinetində Baş nazir Əli Əsədovun sədrliyi ilə Bakıda və Abşeron yarımadasında normadan artıq yağıntı ilə müşahidə olunan qeyri-sabit hava şəraiti, intensiv yağıntının törətdiyi fəsadların araşdırılması və nəticələrinin aradan qaldırılması, gələcəkdə belə halların baş verməməsi ilə bağlı məsələlərə həsr olunmuş iclas keçirilib.

İclasda aidiyyəti qurumların rəhbərləri iştirak ediblər.

Baş nazir Əli Əsədov yağıntıların normadan artıq olması kimi obyektiv səbəblərlə yanaşı, subyektiv səbəblərin də mövcudluğunu bildirib. O, müvafiq infrastrukturun tam gücü ilə işləməməsinin bir sıra ciddi fəsadlar və itkilərlə nəticələndiyini deyib.

İclasda Baş nazir ziyan dəymiş infrastrukturun fəaliyyətinin bərpası üçün zəruri tədbirlərin görüldüyünü, vəziyyətin araşdırıldığını və nəticələrin aradan qaldırılmasından sonra yekun qərarların qəbul ediləcəyini diqqətə çatdırıb.

Əli Əsədov aidiyyəti qurumların rəhbərlərinə müvafiq tapşırıqlar verib.

Baş nazir iclasda həyata keçiriləcək bütün tədbirlərin keyfiyyətlə yerinə yetirilməsində və qısa zamanda başa çatdırılmasında aidiyyəti qurumların ciddi məsuliyyət daşıdığını diqqətə çatdırıb.