Xəzər dənizi və Bakı buxtasının ekoloji vəziyyətinə dair iclas keçirilib - Baku TV

“Uzun müddət antropogen təsirlərin davam etməsi nəticəsində Bakı buxtasında çirklənmə dərinləşir və onun ekoloji vəziyyətinin yaxşılaşdırılmasına kəskin zərurət yaranıb”.

Bunu Baş nazir Əli Əsədov Nazirlər Kabinetində keçirilən iclasda deyib.

O, Xəzər dənizinin Azərbaycana mənsub bölməsindəki neft-qaz yataqlarında Sovetlər İttifaqından miras qalan müxtəlif təyinatlı hidrotexniki qurğuların, ləğv edilən və ya konservasiya olunan neft quyularının, estakadaların, yanalma körpülərinin, platformaların köhnəlməsi, korroziyaya uğraması və hidrometeoroloji amillərin təsiri səbəbindən qəzalı vəziyyətə düşməsi nəticəsində yaranan problemlərin dənizin ekoloji vəziyyətinə neqativ təsir göstərdiyini qeyd edib.

İclada məsələ ətrafında müzakirələr aparılaraq aidiyyəti dövlət qurumlarına Xəzər dənizində monitorinqlər reallaşdırmaqla interaktiv xəritə-sxemin hazırlanması, iş həcmlərinin müəyyənləşdirilməsi və prioritetləşdirilməsi, beynəlxalq təcrübənin öyrənilməsi və tədbirlərin dövlət-özəl tərəfdaşlığı prinsipi əsasında icra edilməsi, habelə qəzalı və yararsız vəziyyətdə olan hidrotexniki qurğuların və quyuların demontajı, batan və yarımbatan gəmilərin çıxarılması, görülən tədbirlərin dəniz ətraf mühitinin yaxşılaşmasına təsirinin qiymətləndirilməsinin həyata keçirilməsi üzrə müvafiq tapşırıqlar verilib.

Həmçinin Bakı buxtasının təmizlənməsi və ekoloji vəziyyətinin yaxşılaşdırılması məqsədilə dəniz suyunun çəkilməsi ilə sahilə yaxın hissələrdə üzə çıxmış metal konstruksiyaların ərazidən kənarlaşdırılması istiqamətində təxirəsalınmaz işləri özündə ehtiva edən Tədbirlər Planının hazırlanması tapşırığı verilib.

Buraya eyni zamanda hövzəyə çirkab suların axıdılmasının qarşısının alınması, suyun səthində üzən neft ləkələrinin və müxtəlif tullantıların, habelə ətrafda neftlə çirklənən torpaqların təmizlənməsi daxildir.