Ararat Mirzoyan region ölkələri ilə münasibətlərdən danışıb

“Cəmiyyətlərin və hər iki ölkənin hakimiyyət nümayəndələrinin ritorikasında bir-birinə qarşı aqressiya və düşmənçilik azalır”.

Bunu Ermənistanın xarici işlər naziri Ararat Mirzoyan Parlamentin Xarici Əlaqələr Komissiyasının iclasında Azərbaycan-Ermənistan münasibətlərinə toxunarkən deyib.

“Bütün məsələlərin həll olunduğunu, heç bir problemin olmadığını və Ermənistanla Azərbaycan arasında sülhün tamamilə problemsiz olduğunu demək – bu, həddindən artıq şişirtmədir. Uzun illər davam edən münaqişə olub, çox qan tökülüb və yaralar hələ də təzədir. Lakin hər iki dövlət arasında bir-birinə qarşı aqressiya və düşmənçilik getdikcə azalır”, – deyə nazir qeyd edib.

Ararat Mirzoyan Türkiyə ilə münasibətlərə də toxunub və bildirib ki, bu iki ölkə arasında da əlaqələr kifayət qədər dinamik, pozitiv və ümidverici dialoq şəklindədir.

“Ermənistanla Türkiyə arasındakı dialoq artıq kifayət qədər irəliləyib ki, iki ölkə arasında diplomatik münasibətlərin qurulması və sərhədlərin açılması mümkün olsun. Biz bunu türk tərəfdaşlarımıza da bildiririk. Hazırda tərəflər hətta iki ölkənin universitetlərində qarşılıqlı tələbələr üçün təqaüdlərin yaradılması imkanını müzakirə edirlər”, – deyə Ermənistanın xarici işlər naziri bildirib.