BBC-nin Qarabağdan qərəzli xəbərinin arxasında nə dayanır?

Böyük Britaniyanın nüfuzlu media orqanı BBC-nin Qarabağla bağlı hazırladığı veriliş təəssüf və hiddət doğurur.

Aparıcısı Kristian Frezerin olduğu “Context” verilişində iki erməni Qarabağdakı hadisələrlə bağlı danışır. Daha doğrusu, nağıl söyləyir, hədyan səsləndirir. Veriliş “Dağlıq Qarabağda humanitar böhran” başlığı ilə təqdim olunub. Danışanlar da bu mövzuda ənənəvi erməni fikirlərini təqdim edirlər.

BBC Britaniyanın ictimai yayım xidmətçisidir. Hökumətlə açıq-gizli əməkdaşlığı var. BBC-nin bu süjetinin özü qərəz və ədalətsizlikdən ibarətdir.

Necə yəni böhran? Qarabağda böhranmı var? İkincisi, niyə BBC Qarabağ adının önünə “Dağlıq” sözünü yapışdırır? Axı Dağlıq Qarabağ deyilən bir ərazi yoxdur. Qarabağ iqtisadi rayonu var. Bu da Azərbaycan ərazisidir, vəssalam. Bu, qərəzin bir hissəsidir.

BBC Artak Beqlaryanı “Artsax respublikasının keçmiş ombudsmanı” kimi tanıdır. Bu qədəri də yox! Axı Qarabağda heç bir dövlət olmayıb. Hələ Azərbaycan-Ermənistan münaqişəsi zamanı qondarma rejimin “müstəqilliyini” heç bir ölkə tanımamışdı.

İndi isə o qondarma rejim də tarixin arxivinə gömülüb. Azərbaycan yeni reallıq yaradıb. Bəs görəsən, BBC-yə nə gəlib ki, “Artsax respublikası” ifadəsindən istifadə edir? Bu, erməni təbliğatının dilidir. Bu, Ermənistanın işğalçılıq siyasətinin propaqandasını aparmaqdır.

Böyük Britaniya ilə Azərbaycan strateji tərəfdaşlıq münasibətlərinə malikdir. Britaniya özü Azərbaycanın mövqeyini ikiəlli dəstəkləyir. BBC, yaxşı olar ki, səhvini düzəltsin. Hətta peşəkar media orqanıdırsa, etdiyi rəzilliyə görə Azərbaycandan üzr də istəməlidir.