Beynəlxalq miqyasda diasporumuzun mövqeyi necədir? | GLOBAL PANORAMA

Baku TV-nin “Global Panorama” verilişinin yeni buraxılışı yayımlanıb.

Verilişin budəfəki sayında Azərbaycan diasporunun diplomatiyadakı rolundan və beynəlxalq arenadakı əhəmiyyətindən bəhs olunub.

Bildirilib ki, diaspor amili ölkəmizin beynəlxalq nüfuzunun artması və milli maraqlarımızın daha yaxşı təmin olunması üçün vacibdir.

Həmçinin vurğulanıb ki, diaspor təşkilatlarının fəaliyyətində Azərbaycan həqiqətlərinin beynəlxalq səviyyədə təbliğ olunması xüsusi əhəmiyyət kəsb edir:

“Xüsusilə, Qarabağ münaqişəsi və 44 günlük Vətən müharibəsindən sonra diaspor təşkilatlarının fəaliyyəti daha da intensivləşib. Bu təşkilatlar Azərbaycanın haqlı mövqeyini dünya ictimaiyyətinə çatdırmaq, Ermənistanın təcavüzkar siyasətini ifşa etmək üçün mütəmadi tədbirlər təşkil edir, beynəlxalq mediada çıxışlar edirlər. Azərbaycanın diaspor təşkilatları eyni zamanda milli həmrəyliyi gücləndirmək və milli dəyərləri qoruyub saxlamaq istiqamətində fəaliyyət göstərirlər”.

O da qeyd edilib ki, diaspor təşkilatları müxtəlif vasitələrdən istifadə edərək Azərbaycan həqiqətlərini bütün dünyada yayırlar:

“Bunun üçün beynəlxalq tədbirlərdə iştirak etmək, mediada və sosial şəbəkələrdə aktiv olmaq onların fəaliyyətinin ayrılmaz hissəsidir. Xüsusilə, beynəlxalq mediada və akademik müzakirələrdə Azərbaycanın haqlı mövqeyini müdafiə edən çıxışlar etmək, məqalələr dərc etdirmək və mütəxəssislərin diqqətini Azərbaycanın haqq işinə cəlb etmək diaspor təşkilatlarının əsas fəaliyyət istiqamətlərindən biridir”.