Biz sadəcə oturub gözləyə bilmərik | İlham Əliyev
“Fransa, Hindistan və Yunanıstan Ermənistanı bizə qarşı silahlandırır. Özü də onlar bunu açıq və nümayişkaranə şəkildə edirlər və hətta çalışırlar ki, bununla bizə nə isə sübuta yetirsinlər. Biz sadəcə oturub gözləyə bilmərik”.
Prezident İlham Əliyev aprelin 23-də ADA Universitetində təşkil olunan “COP29 və Azərbaycan üçün Yaşıl Baxış” mövzusunda beynəlxalq forumda çıxışında belə deyib.
“Biz bu mövqeyi açıq şəkildə Ermənistan hökumətinə və Ermənistanın bu gün qayğısına qalmağa çalışan tərəflərə bildirmişik. Əgər özümüzə ciddi təhdid görsək, biz ciddi tədbirlər görməli olacağıq”, – deyə dövlət başçısı qeyd edib.
Prezident İlham Əliyev həmçinin vurğulayıb ki, Cənubi Qafqazda ayırıcı xətləri çəkmək üçün bəzi cəhdlər göstərilir. Məhz bu səbəbdən Azərbaycan Avropa Komissiyasının sədri, ABŞ-nin dövlət katibi və Ermənistanın Baş nazirinin tarixdə görünməmiş Brüssel görüşündən narahatlığını bildirib.
Dövlət başçısı əlavə edib ki, bu təsisatın tarixində heç zaman keçmiş SSRİ respublikası ilə bu cür görüş olmayıb. Hətta Ukrayna, Gürcüstan və Moldova ilə bu cür görüş keçirilməyib.
Prezident İlham Əliyev Ermənistanın geri qaytardığı kəndlərlə bağlı məsləyə də toxunub. Bildirib ki, Azərbaycan İkinci Qarabağ müharibəsindən dərhal sonra dörd kənd məsələsini qaldırıb.
“Əslində, biz həmin kəndləri heç vaxt yaddan çıxarmamışıq. Eksklavlar məsələsi başqadır, çünki o, daha mürəkkəbdir. Həmin eksklavlar digər ölkənin əhatəsində olan ərazidə yerləşir. Ona görə onlar delimitasiya prosesində həll olunmalıdır”, – deyə Prezident İlham Əliyev vurğulayıb.