BMT-də Azərbaycanın təşəbbüsü ilə vacib qətnamə qəbul edildi

Martın 21-də BMT-nin Qadınların Statusu Komissiyasının 69-cu sessiyası çərçivəsində Azərbaycanın təklifi əsasında “Silahlı münaqişələr zamanı girov götürülən, o cümlədən sonradan həbs edilən qadınların və uşaqların azadlığa buraxılması” adlı qətnamə qəbul olunub.

Adıçəkilən sənəd BMT-nin elektron bazasına yerləşdirilib.

1994-cü ildən başlayaraq iki ildən bir gündəmə gətirilən bu sənəd silahlı qarşıdurmalar zamanı qadın və uşaqların vəziyyətinə xüsusi önəm verir və girovluq məsələsini vurğulayır. Qətnamədə bu cür hərəkətlərin qanuna zidd və əsassız olduğu qəti şəkildə qeyd edilir.

Sənədin əsas məqsədlərindən biri beynəlxalq əməkdaşlığın genişləndirilməsi, girovların təhlükəsizliyinin və insan ləyaqətinin qorunması, onların azadlığa çıxarılması, reabilitasiyası və cəmiyyətə yenidən inteqrasiyası üçün mexanizmlərin təkmilləşdirilməsidir.

BMT-nin Baş katibi Antoniu Quterriş Qadınların Statusu Komissiyasının 71-ci sessiyasında bu qətnamənin icrasına dair ətraflı hesabat təqdim edəcək.