Ceyhun Bayramov Gürcüstanda | Tbilisidə keçirilən görüş barədə detallar

Xarici işlər naziri Ceyhun Bayramov Gürcüstana səfər edib.

Azərbaycanın xarici siyasət idarəsinin rəhbərini Gürcüstanın xarici işlər naziri Maka Boçorişvili qarşılayıb. Ceyhun Bayramovla Maka Boçorişvili arasında təkbətək və geniş tərkibdə görüş keçirilib.

Görüş çərçivəsində Azərbaycan və Gürcüstan nümayəndə heyətləri arasında enerji, nəqliyyat, regional əlaqələr, ikitərəfli və çoxtərəfli əməkdaşlığın genişləndirilməsi perspektivləri də daxil olmaqla əməkdaşlığın əsas sahələri müzakirə edilib. Qarşılıqlı maraq doğuran regional və beynəlxalq təhlükəsizlik məsələləri də gündəlikdə yüksək yer tutub.

Ceyhun Bayramov Tbilisidə gürcü həmkarı Maka Boçorişvili ilə birgə keçirilən brifinqdə qeyd edib ki, ölkələrimizin birgə iştirakı ilə həyata keçirilən nəhəng layihələr təkcə Azərbaycan və Gürcüstana deyil, ümumilikdə daha geniş coğrafiyaya əhəmiyyətli töhfələr verib:

“Bu layihələr həm ölkələrimizin, həm də xalqlarımızın rifahının yüksəldilməsi baxımından xüsusi əhəmiyyət daşıyır və onların təsir dairəsi regional sərhədləri aşaraq qlobal miqyasda hiss olunur. Bu nəhəng layihələr sırasında Bakı-Tbilisi-Ceyhan neft kəməri, Cənub Qaz Dəhlizi, Bakı-Tbilisi-Qars dəmir yolu və digər mühüm təşəbbüsləri xüsusilə qeyd edə bilərik.

Azərbaycan Gürcüstanın əsas investorlarından biri hesab olunur və son illər ərzində ölkə tərəfindən Gürcüstan iqtisadiyyatına 3,6 milyard ABŞ dolları həcmində investisiya qoyulub”.

M.Boçorişvili isə mövcud geosiyasi şəraitdə Gürcüstan və Azərbaycandakı siyasi sabitliyin ortaq maraqlarımızın qorunmasına xidmət etdiyini vurğulayıb.

Qeyd edək ki, Ceyhun Bayramovun səfər çərçivəsində Gürcüstan Prezidenti Mixeil Kavelaşvili, Baş nazir İrakli Kobaxidze və parlamentin sədri Şalva Papuaşvili ilə də görüşləri planlaşdırılıb.