Dezinformasiyaya qarşı ortaq mübarizə üçün Bakı yeni platforma yaradır

Bakıda Türk Dövlətləri Təşkilatının Media Forumu keçirilir. Məqsəd türkdilli ölkələr arasında media və kommunikasiya sahəsində əməkdaşlığı gücləndirmək, qarşılıqlı informasiya təhlükəsizliyini daha dayanıqlı hala gətirməkdir.

Forum çərçivəsində “Müasir dövrdə artan qlobal informasiya təhdidlərinə qarşı dayanıqlı və preventiv addımlar” mövzusunda panel sessiya təşkil olunub. Burada iştirakçılar dezinformasiya kampaniyalarının sərhəd tanımayan şəkildə yayılmasının yaratdığı riskləri və türk dövlətlərinin media ekosistemində dayanıqlığın artırılmasının strateji əhəmiyyətini müzakirə ediblər.

Panel zamanı nümayəndələr öz ölkələrinin media sahəsində apardıqları işlər, dezinformasiya ilə mübarizə tədbirləri və TDT çərçivəsində fəaliyyət göstərən platformaların hazırkı vəziyyəti barədə məlumat veriblər. Azərbaycan tərəfi əməkdaşlığın Türk Dövlətləri Təşkilatı üçün prioritet olduğunu xüsusi vurğulayıb. Eləcə də Azərbaycan-Özbəkistan arasında mövcud “yol xəritəsi” çərçivəsində həyata keçirilmiş qarşılıqlı layihələr Forum iştirakçılarının diqqətinə çatdırılıb.

Forumun digər paneli isə “Rəqəmsal media mühitində TDT-yə üzv dövlətlərin qarşılıqlı əməkdaşlıq imkanları” mövzusuna həsr olunub. Burada rəqəmsal informasiya axınının sürətlə dəyişdiyi bir dövrdə daha çevik, qarşılıqlı etimada əsaslanan əməkdaşlıq formatlarının qurulması vacib sayılıb.

Qırğızıstan nümayəndələri isə sosial şəbəkələrdən yayılan dezinformasiyanın cəzasız qaldığını bildirərək vacib təkliflə çıxış ediblər.

“Media savadlılığı çox vacibdir. Amma bu, təkcə dezinformasiyanı seçməklə bitmir. Sosial şəbəkələrdən yayılan saxta məlumatlara görə ölkələrimizdə heç bir mexanizm işləmir. Ona görə də düşünürəm ki, sosial şəbəkə şirkətlərinin TDT ölkələrində ofisləri açılsa, yaxşı olar”, – deyə Qırğızıstanın media nümayəndəsi Zarina Kalmuratova bildirib.

Bakıda keçirilən Media Forumu türkdilli ölkələrin informasiya mühitində həmrəylik, təhlükəsizlik və strateji əməkdaşlığı gücləndirmək istiqamətində mühüm addım kimi qiymətləndirilir.