Dmitri Peskov Kremlə hücumun araşdırıldığını bildirib

“Kiyev həm hədəfləri, həm də zərbə üçün vasitələri Vaşinqtonun diktəsi ilə seçir”.

Bunu Rusiya Prezidentinin mətbuat katibi Dmitri Peskov deyib. O bildirib ki, Ukrayna PUA-larının Kremlə hücumu araşdırılır: “Biz inanırıq ki, Kremlə hücumun arxasında Kiyev, Kiyevin arxasında isə Vaşinqton dayanır. ABŞ-nin bu məsələdən boyun qaçırmaq cəhdləri gülüncdür”.

D.Peskovun sözlərinə görə, sözügedən hadisədən sonra Rusiya Ordusunun Ukraynada apardığı xüsusi hərbi əməliyyatın məqsəd və vəzifələri dəyişməyib. “Biz cavab tədbirləri üçün müxtəlif variantları nəzərdən keçiririk. Hazırda Kremldə vəziyyət normaldır, hər kəs öz işi ilə məşğuldur. Məlum hadisədən sonra Kremlin təhlükəsizliyi daha da gücləndiriləcək”, – deyə mətbuat katibi vurğulayıb.

Qeyd edək ki, mayın 3-də Kremlə dronlarla hücum olub. Rusiya Prezidentinin mətbuat xidməti bu məsələdə Ukraynanı ittiham edib və hadisəni terror aktı kimi qiymətləndirib. Kremldən bildirilib ki, bu, dövlət başçısı Vladimir Putinə qarşı sui-qəsd cəhdidir. Ukrayna tərəfi isə bütün ittihamları rədd edib