Ərdoğan Kosovo və Metoxiyadakı vəziyyətlə maraqlanıb

Serbiya Prezidenti Aleksandar Vuçiç Türkiyə Prezidenti Rəcəb Tayyib Ərdoğanla telefon danışığı zamanı bölgədə sülhün sabitləşməsi üçün dəstək istəyib.

Bu barədə Serbiya liderinin mətbuat xidmətinin yaydığı bəyanatda deyilir. “Prezident Ərdoğan Kosovo və Metoxiyadakı mövcud vəziyyətlə maraqlanıb və Prezident Vuçiç ona serblərə qarşı zorakılığın artmasına səbəb olan hadisələrin xronologiyası ilə bağlı məlumat verib. O həmçinin Türkiyə dövlət başçısından regionda sülh və sabitliyi qorumaq üçün ölkəsinin nüfuzundan istifadə etməyi xahiş edib”, – deyə A.Vuçiçin mətbuat xidməti söhbətin təfərrüatlarını açıqlayıb.

A.Vuçiç R.T.Ərdoğanı Türkiyədə keçirilən prezident seçkilərində qələbəsi münasibətilə təbrik edərək, ona ölkəni inkişaf yolunda uğurla aparmasını arzulayıb. Həmçinin A.Vuçiç R.T.Ərdoğanı Serbiyaya səfərə dəvət edib.

Ərdoğan həmçinin Kosovanın Baş naziri Albin Kurti ilə də telefonla danışıb. İkitərəfli münasibətlərin və regional məsələlərin də müzakirə olunduğu telefon danışıqlarında Türkiyənin dövlət başçısı Kosovanın şimalında baş verənlərlə bağlı bölgədə davamlı sülh və sabitliyin bərqərar olmasının yeganə yolunun dialoq prosesində irəliləmək olduğunu bildirib. Ərdoğan Türkiyə olaraq dialoq prosesinə öz töhfələrini verməyə hazır olduqlarını bildirib.