Erməni politoloq Netanyahu və Ərdoğanın Bakıya gözlənilən səfərini şərh etdi

“İsrail Baş naziri Netanyahunun Azərbaycana uzunmüddətli səfəri Bakının ciddi diplomatik irəliləyiş əldə etməsidir”.

Bu sözləri erməni politoloq Hrant Mikaelyan yerli mediaya müsahibəsində Netanyahu və Türkiyə lideri Ərdoğanın Bakıya gözlənilən səfərini şərh edərkən deyib.

“Unutmaq olmaz ki, təxminən bir ay əvvəl ABŞ-nin xüsusi elçisi Stiv Uitkoff Azərbaycanda olub və o, müsahibəsində məşğul olduğu üç münaqişədən, o cümlədən Ermənistan-Azərbaycan münaqişəsindən bəhs edib. Digər tərəfdən, bu yaxınlarda İran Prezidenti, əslən azərbaycanlı Məsud Pezeşkian da Bakıda idi və o, Bakıda özünü evdəki kimi hiss etdiyini bildirdi”, – o vurğulayıb.

Mikaelyanın fikrincə, Azərbaycan ABŞ-nin yeni administrasiyası ilə münasibətlər qurur və bu məsələdə İsrail yardımçı olur:

“Eyni zamanda Azərbaycan Türkiyə ilə İsrail arasında münasibətləri yaxşılaşdırmaq istəyir və bu yaxınlarda Ankara ilə Təl-Əviv arasında görüş Bakıda keçirildi. Ona görə də Ərdoğan və Netanyahunun Azərbaycana gəlişinə bu kontekstdə baxmaq lazımdır. Netanyahu da öz növbəsində Ankara ilə münasibətlərini yaxşılaşdırmaq istəyir”.

Azərbaycan liderinin paralel olaraq 9 mayda Moskvada parada da qatılacağını xatırladan erməni politoloq etiraf edib ki, Azərbaycan diplomatik problemlərini çox uğurla həll edir, nailiyyətləri var və irəliləyir, müəyyən beynəlxalq missiyanı öz üzərinə götürür.