Ermənistanın zavod tikməsi region üçün ciddi təhlükə yaradır

Təcavüzkar Ermənistanın otuz illik işğal dövründə ökəmizə yönəlmiş cinayətləri yalnız dinc əhaliyə qarşı soyqırımı siyasəti ilə məhdudlaşmır.

Eyni zamanda vandalizm aktları və ekoterror vasitəsilə Azərbaycan ərazilərində çoxistiqamətli bəşəri cinayətlər törədilib. Mövcud vəziyyətdə Ermənistan tərəfinin Azərbaycanın Sədərəklə sərhədyanı bölgəsində, Arazdəyəndə 70 milyon dollarlıq iri metallurgiya zavodu inşa etməsi sülh proseslərinə bütünlüklə ziddir. Bu fakt onu deməyə əsas verir ki, hazırda Azərbaycan və Türkiyə ilə münasibətlərin normallaşması prosesi beynəlxalq səviyyəli siyasi gündəm olsa da, rəsmi İrəvan hələ də qarşılıqlı əlaqələrə dair tam qətiyyət nümayiş etdirmir.

Prezident İlham Əliyevin də dediyi kimi, transsərhəd təhlükələri mütləq nəzərə alınmalıdır və Azərbaycanın burada sərgilədiyi mövqe yenə də beynəlxalq təcrübəyə, beynəlxalq konvensiyalara, o cümlədən Espo Konvensiyasına əsaslanır. Odur ki, transsərhəd çayların çirkləndirilməsi və ölkələrin sərhədlərinə yaxın ərazilərdə ekoloji baxımdan təhlükəli müəssisələrin yaradılması qonşu ölkələrlə mütləq razılaşdırılmalıdır. Adıçəkilən zavod təkcə ölkəmizə qarşı deyil, eyni zamanda Türkiyə, İran, eləcə də bütün Xəzərsahili ölkələrin ekoloji sabitliyinə qarşı təhdiddir.

Belə olan halda beynəlxalq hüquq birmənalı şəkildə göstərir ki, Ermənistanın Arazdəyəndə metallurgiya zavodu tikməsi ekotarazlığın qorunması, atmosferə normadan artıq tullantıların buraxılmaması, su hövzələrində təmizliyin qorunması kimi mühüm bəşəri dəyərlərə ziddir.