Ətraf mühitə ziyan vuranlar kimlərdir? | Dünyanı ən çox çirkləndirən ölkələr

Dünyada sənayenin inkişafı, əhalinin artımı ilə iqlim də dəyişir. Sənaye tullantıları, insan təsirləri təbiətin nizamını pozur, istiləşmə müşahidə olunur, hava çirklənir, daşqınlar baş verir və s. Bir sözlə, bizi əhatə edən dünya normal halından uzaqlaşır.

Bunun üçün də Birləşmiş Millətlər Təşkilatı 1995-ci ildə ilk dəfə COP – “Conference of the Parties”, yəni “Tərəflərin Konfransı” adlı tədbir təşkil edir. İlk tədbir Almaniyada olub.

Ondan sonra hər il BMT çərçivəsində iqlimlə bağlı müzakirələr aparılır. COP tədbirlərinin məqsədi 2015-ci ildə imzalanan Paris Sazişinin tələblərinə uyğun olaraq, dünyada karbon qazının miqdarını sənayeləşmədən əvvəlki dövrdə olduğu kimi, 1,5 dərəcə Selsiyə çatdırmaqdır. Bu, COP tədbirlərində müzakirə olunur, razılaşdırılır.

İnkişaf etmiş ölkələr inkişaf etməkdə olan ölkələrə iqlim dəyişikliyinin təsirini azaltmaq və uyğunlaşmaqda kömək etmək məqsədilə maliyyə yardımı üçün fond yaradırlar.

Ətraf mühitə ən çox ziyan iqtisadi cəhətdən inkişaf etmiş ölkələr tərəfindən vurulur. Çünki ərazilərində sənaye müəssisələri çoxdur, iqtisadi aktivlik artan templə davam edir. Məntiqlə də iqlim dəyişməsinə qarşı mübarizə üçün ən çox vəsaiti onlar ödəməlidirlər.

Dünyanın ən böyük iqtisadiyyatına malik ABŞ hələ Donald Trampın birinci prezidentliyi dövründə iqlim dəyişikliyi ilə mübarizə üçün ən böyük müqavilə olan Paris Sazişindən çıxıb.

Daha sonra Birləşmiş Ştatlar Cozef Bayden hakimiyyəti dönəmində yenidən müqaviləyə qayıdıb. Bu gedişlər təbii olaraq inkişaf etmiş digər ölkələrin iqlim dəyişikliyi ilə mübarizə üçün maliyyə ayırmasında tərəddüdlər yaradır.

Maraqlıdır, bəs niyə dünyanı ən çox çirkləndirənlər təmiz planet üçün pul xərcləmək istəmir?