Fələstinin Azərbaycandakı səfirliyi dünyaya çağırış etdi | Qəzzadakı böhran daha da dərinləşir...

Fələstinin Azərbaycandakı səfirliyi Qəzza zolağında yaşanan humanitar böhranla bağlı beynəlxalq birliyi təcili tədbirlər görməyə çağırıb.

Səfirliyin yaydığı bəyanatda bildirilir ki, Qəzza zolağında İsrailin hərbi əməliyyatları 19 aydan çoxdur davam edir və görünməmiş humanitar fəlakətə səbəb olub.

“Bu günə qədər həmin təcavüz 52 500-dən çox fələstinlinin şəhid olması, əksəriyyəti qadın və uşaq olan 118 000-dən çox insanın yaralanması ilə nəticələnib, minlərlə qurban hələ də dağıntılar altında qalıb. Bu həmçinin xəstəxanalar, məktəblər və sığınacaqlar da daxil olmaqla infrastrukturun geniş şəkildə məhv edilməsinə və 1,9 milyondan çox insanın məcburi köçkün düşməsinə səbəb olub.

Qəzza zolağındakı binaların təqribən 80 %-i zərər görüb və humanitar yardımın daxil olmasının sıx blokadası böhranı daha da dərinləşdirib ki, bu da onlarla insanın, əksəriyyəti uşaqlar, xəstələr və qocaların aclıqdan ölməsinə səbəb olub”, ‒ diplomatik nümayəndəliyin bəyanatında belə deyilir.

Davam edən bu gərginlik fonunda Fələstin səfirliyi bütün ölkələri, beynəlxalq qurumları və media orqanlarını beynəlxalq hüquq pozuntularının qarşısının alınması üçün səy göstərməyə, beynəlxalq hüququn müdafiəsini təmin etməyə və Fələstin xalqı üçün təcili beynəlxalq müdafiənin, beynəlxalq hüququn icrasının təmin edilməsinə dəstək verməyə çağırıb.