Gürcüstanda etirazçıların sayı azalır, yoxsa...? | Narazılıqların ard-arası kəsilmir

2024-cü ili gürcü xalqı üçün seçim ili də adlandırmaq olar. Oktyabr ayında parlament seçkiləri ilə hakim “Gürcü Arzusu” Partiyasına “hə” deyən gürcülər dekabrın 14-də isə yeni prezidentlərini seçmək üçün prosesə başladılar.

Seçkilərin nəticələrinə əsasən, keçmiş futbolçu, hakim “Gürcü Arzusu” Partiyasının namizədi olan Mixeil Kavelaşvili ölkənin altıncı Prezidenti olub. Lakin hələ də narazılıqların ard-arası kəsilmir.

Beşinci prezident Salome Zurabişvili hər nə qədər bu seçkilərin nəticələrini tanımadığını desə də, ötən gün yeni Prezidentin andiçməsi baş tutub.

Gürcüstanda etirazların səbəblərinə gəldikdə isə Tbilisinin Qərbin xoşuna gəlməyən qanunları qəbul etməsi, eləcə də Gürcüstan hakimiyyətinin Avropa İttifaqı ilə üzvlük danışıqlarını 2028-ci ilə qədər dayandırdığını elan etməsi Brüssellə münasibətləri gərginləşdirib. Ardınca isə bu günə qədər uzanan etirazlar dalğası başlayıb.

Seçkilərin nəticələri, “Xarici agentlər haqqında” Qanunun qəbulu ilə xarici qrantlardan məhrum olan kütlənin narazılığı və davam edən etirazlar ölkədə siyasi sabitliyin sarsıldığını göstərir. Ölkənin daxili siyasi gərginliyi təkcə yerli siyasəti deyil, həm də regiondakı tarazlığı təsir altına ala bilər.

Bəs yeni seçilən Prezident ölkədə hökm sürən gərginliyi dağıda biləcəkmi?