İcazədən sonra Ukrayna hərəkətə keçdi | Qərb silahları Kiyevə xeyir verəcək?

Ukrayna Rusiya ərazisinə zərbələr endirmək üçün ABŞ istehsalı olan silahlardan istifadə ilə bağlı Vaşinqtonun icazəsindən artıq yararlanıb.

Birləşmiş Ştatların Prezidenti Cozef Bayden isə bu hadisəni Rusiya-Ukrayna müharibəsinin gedişatında ölkəsinin növbəti uğuru kimi dəyərləndirib. O bildirib ki, bu müddət ərzində Rusiya Ordusu onsuz da xeyli itki verib. Üstəlik, NATO indi hər zamankından daha güclüdür və bu da müharibədə Kiyevin əlini daha da gücləndirəcək.

Ukraynanın Amerika silahları ilə Rusiya ərazisinə zərbələr endirməsi Vaşinqtonun Kiyevə ayırdığı 61 milyard dollarlıq yardım paketindən sonra ilkdir və Rusiyaya qarşı yeni və daha ciddi hücumların növbəti anonsu kimi dəyərləndirilir. Bu isə müharibənin əhatə dairəsinin genişlənməsi ilə bağlı ehtimalları daha da artırır.

Artıq Ukrayna cəbhəsində Qərb Rusiya ilə daha çox üz-üzə gələcək. Çünki Kiyevin istənilən uğursuzluğu Qərbin məğlubiyyəti olacaq ki, bu da gərginliyi daha da artıracaq.