İki ölkəni birləşdirən dəmiryol xəttinin əhəmiyyəti nələrdir? | Logistika üçün yeni imkanlar

Qars-İğdır-Aralık-Dilucu dəmir yolu xəttinin təməlqoyma mərasimi avqustun 22-də keçiriləcək.

Bu barədə Türkiyənin nəqliyyat və infrastruktur naziri Abdulkadir Uraloğlu məlumat verib.

Türkiyəli nazirin sözlərinə görə, Zəngəzur dəhlizinin fəaliyyətə başlaması ilə Pekindən Londona qədər davam edən şərq-qərb xətti daha məhsuldar şəkildə fəaliyyət göstərəcək.

Təməli atılacaq bu xətt Azərbaycanın digər əraziləri ilə Naxçıvan arasında əlaqəni təmin edəcək Zəngəzur dəhlizinin mühüm bir hissəsidir:

"Bu xətt sayəsində Türkiyə ilə Azərbaycan arasında fasiləsiz yeni bir dəmir yolu əlaqəsi təmin olunacaq. Eyni zamanda Şərq və Cənub-Şərqi Anadolunun istehsal potensialı xarici bazarlara daha sürətli çatacaq, Aralıq dənizinin turizm potensialı artacaq.

Bundan əlavə, bu xətt Trans-Xəzər və Şimal-Cənub dəhlizlərini gücləndirərək Avrasiyanın tədarük və logistika şəbəkələrini möhkəmləndirəcək, Türkiyəni regional əməkdaşlığın mərkəzinə çevirəcək. Orta Dəhlizin dəmir yolu və avtomobil yolu yükdaşıma qabiliyyəti artacaq”, ‒ deyə türkiyəli nazir vurğulayıb.

Uraloğlu sözügedən xəttin Türkiyənin logistika qabiliyyətini artıracağını və Asiyaya gedən ticarət marşrutlarında geostrateji əhəmiyyətini çoxaldacağını da bildirib.

“Dəmir yolu xətti 224 kilometr uzunluğunda, qoşa xətli, elektrifikasiyalı olacaq və siqnalizasiya ilə təchiz ediləcək. Bu xətt ildə 5,5 milyon sərnişin və 15 milyon ton yük daşıma qabiliyyətinə sahib olacaq”, ‒ deyə nazir qeyd edib.

O əlavə edib ki, lahiyədə 24 tunel, 10 körpü, 171 keçid yer alacaq.