İlham Əliyev Dövlət Reklam Agentliyinə yeni sədr təyin etdi

Prezident İlham Əliyev Aydın İbadovun Dövlət Reklam Agentliyinin İdarə Heyətinin sədri vəzifəsindən azad edilməsi haqqında sərəncam imzalayıb.

Dövlət başçısının digər sərəncamı ilə Fərhad Adıgözəlov həmin vəzifəyə təyin edilib.

Qeyd edək ki, Fərhad Adıgözəlov 1977-ci ildə Bakıda anadan olub. O, əmək fəaliyyətinə 2000-ci ildə “Azərsığorta” Dövlət Sığorta Şirkətində başlayıb. Beynəlxalq Bankda mütəxəssis, Daşınmaz Əmlakın Dövlət Reyestri Xidmətinin rəis köməkçisi, “Kapital Bank” da departament direktoru vəzifəsində çalışıb.

Daha sonra Fərhad Adıgözəlov 2013-2014-cü illərdə maliyyə nazirinin köməkçisi, 2015-2017-ci illərdə isə “Azər Türk Bank” ASC-nin İdarə Heyətinin sədri və 2020-ci ilin sentyabrından isə Milli Depozit Mərkəzinin İdarə Heyətinin sədr müavini olub.

Fərhad Adıgözəlov Prezident İlham Əliyevin 2021-ci il dekabrın 7-də imzaladığı sərəncamla Dövlət Sığorta Kommersiya Şirkətinə sədr təyin edilib.