İlham Əliyev DSX-nin bir sıra hərbi qulluqçularını təltif etdi - Baku TV

Dövlət Sərhəd Xidmətinin hərbi qulluqçularına ali hərbi rütbələr verilib.

Prezident İlham Əliyev bununla bağlı Sərəncam imzalayıb.

Sənədə əsasən, general-mayor Babək Ələkbərova, general-mayor Aqşin Məhərrəmova və general-mayor Faiq Məmmədova "general-leytenant" ali hərbi rütbəsi, polkovnik Elfan Quliyevə isə "general-mayor" ali hərbi rütbəsi verilib.

Həmçinin dövlət başçısının sərəncamı ilə Azərbaycanın ərazi bütövlüyünün bərpa edilməsi uğrunda gedən döyüş əməliyyatlarında və dövlət sərhədinin mühafizəsi üzrə xidməti vəzifələrinin icrası zamanı igidlik və mərdlik göstərmiş, hərbi hissə qarşısında qoyulmuş tapşırıqları icra edərkən vəzifə borcunu şərəflə yerinə yetirərək şəhid olmuş Dövlət Sərhəd Xidmətinin 41 hərbi qulluqçusu və mülki işçisi ölümündən sonra 3-cü dərəcəli "Vətənə xidmətə görə" ordeni ilə təltif edilib.

Prezident İlham Əliyevin digər sərəncamı ilə Azərbaycan dövlət sərhədinin mühafizəsinin təmin edilməsində, ərazi bütövlüyünün qorunub saxlanılmasında və sərhəd mühafizə orqanları qarşısında qoyulmuş tapşırıqların yerinə yetirilməsində fərqləndiklərinə görə Dövlət Sərhəd Xidmətinin bir əməkdaşı 2-ci dərəcəli "Rəşadət" ordeni ilə, 3 əməkdaşı 2-ci dərəcəli "Vətənə xidmətə görə" ordeni ilə, 5 nəfər 3-cü dərəcəli "Vətənə xidmətə görə" ordeni ilə, 13 nəfər "Vətən uğrunda" medalı ilə, 3 nəfər "İgidliyə görə" medalı ilə, 54 nəfər isə "Hərbi xidmətlərə görə" medalı ilə təltif edilib.