İlham Əliyev İsrail Prezidenti İsxak Hersoqa məktub ünvanladı

Prezident İlham Əliyev İsrail Prezidenti İsxak Hersoqa təbrik məktubu ünvanlayıb.

Dövlət başçısı israilli həmkarını Müstəqillik Günü münasibətilə təbrik edib.

Azərbaycanla İsrail arasında mövcud olan dostluq əlaqələrinin və əməkdaşlığın yüksək səviyyədə olmasına diqqət çəkən Prezident İlham Əliyev bu əlaqələrin qarşılıqlı etimad və dəstək kimi möhkəm təməllər üzərində qurulduğunu qeyd edib.

“Azərbaycan yaxın dostu və etibarlı tərəfdaşı olan İsraillə münasibətlərin genişlənməsinə xüsusi əhəmiyyət verir. Bu gün ölkələrimiz iqtisadiyyat, ticarət, müdafiə, humanitar və digər sahələrdə səmərəli qarşılıqlı fəaliyyət göstərirlər. İnanıram ki, Azərbaycanla İsrail arasındakı ənənəvi dostluq münasibətləri, bir sıra mühüm sahələrdə qarşılıqlı faydalı əməkdaşlığımız xalqlarımızın mənafelərinə uyğun olaraq birgə səylərimizlə qarşıdakı dövrdə də yüksələn xətt üzrə inkişaf edəcək və daha da möhkəmlənəcək”, ‒ deyə məktubda qeyd olunub.