İlham Əliyevin Pakistanın Baş nazirinə göndərdiyi məktubda nələr qeyd olundu? - Baku TV

Prezident İlham Əliyev Pakistanın Baş naziri Məhəmməd Şahbaz Şərifə təbrik məktubu göndərib.

“Hörmətli cənab Baş nazir, əziz qardaşım, 23 Mart – Pakistan Günü münasibətilə Sizə və qardaş xalqınıza öz adımdan və Azərbaycan xalqı adından ən səmimi təbriklərimi və xoş arzularımı çatdırmaqdan məmnunluq duyuram.

Azərbaycanla Pakistan arasında əlaqələr çoxşaxəli əməkdaşlıq gündəliyinə malikdir. Bir müddət əvvəl İslamabadda ilk "ASAN xidmət" mərkəzinin fəaliyyətə başlaması genişmiqyaslı dövlətlərarası əməkdaşlığımızın yeni praktiki nəticəsidir.

Çoxtərəfli əsasda da iki ölkə arasında qarşılıqlı etimad və dəstəyə əsaslanan əməkdaşlıq uğurla davam edir. Regional və qlobal məsələlərə ortaq baxışlarımız, beynəlxalq təşkilatlar çərçivəsində qarşılıqlı dəstəyimiz Azərbaycan-Pakistan qardaşlığının və həmrəyliyinin bariz nümunələridir.

Bu bayram günündə sizi bir daha ürəkdən təbrik edir, sizə möhkəm cansağlığı, xoşbəxtlik, qardaş Pakistan xalqının əmin-amanlığı və firavanlığı naminə məsul və şərəfli fəaliyyətinizdə uğurlar və yeni-yeni nailiyyətlər arzulayıram”, – deyə Prezident İlham Əliyevin təbrik məktubunda qeyd olunur.