“İlk dəfədir belə olur” | Paşinyan Azərbaycanla sərhəddən və təklif etdiyi marşrutdan danışdı

“İlk dəfədir ki, Ermənistan büdcəsini Azərbaycanla əldə olunan sülh şəraitində müzakirə edirik. Bir il 8 aydır ki, Ermənistan-Azərbaycan sərhədində atışma nəticəsində əsgər ölümü qeydə alınmır”.

Bunu Ermənistanın Baş naziri Nikol Paşinyan deyib.

“Əldə olunan sülh isə yeni fakt və şəraitin yaranmasına gətirib çıxarıb. Bakı Ermənistana olan tranzit məhdudiyyətlərini aradan qaldırıb. Bu tarixi hadisə, Ermənistanın blokadadan çıxmasının ilk mərhələsidir. Ermənistanın da eyni addımı atması şərtdir. Türkiyə-Azərbaycan, Azərbaycan-Türkiyə istiqamətində hərəkət edən yük maşınlarına olan tranzit məhdudiyyətini aradan qaldırmağa hazırıq. Əsasən Marqara-Yexeqnadzor-Sisyan-Gorus marşrutu üzrə hərəkət təmin edilməlidir. Çünki hazırda bu, yeganə variantdır”, – deyən Paşinyan bildirib ki, İrəvan da Azərbaycana olan tranzit məhdudiyyətlərini aradan qaldırıb. Zəngəzur dəhlizi, “Tramp marşrutu” üzrə də ABŞ ilə intensiv iş gedir.

Paşinyanın sözlərinə görə, layihə region üçün yenidir və müəyyən nüanslar mövcuddur. Bütün bu məsələlər ətrafında isə tezliklə razılıq əldə olunacaq.

Ermənistanın Baş naziri avqustun 8-də Vaşinqtonda Azərbaycan və ABŞ ilə imzalanan birgə bəyannamədən bəzi sitatlar gətirərək, layihənin əhəmiyyətindən bəhs edib.