İrəvanın sülh prosesini uzatma məqsədi | Ermənistan nəyə hazırlıq görür?

Ermənistanın “Yerkrapa” terror təşkilatının başçısı, deputat Sasun Mikayelyan Azərbaycanla sərhəddə yerləşən mövqelərə gedib. Bu barədə yerli mediada reportaj hazırlanıb.

Qeyd edilib ki, Sasun Mikayelyan “Yerkrapa” batalyonlarının döyüş mövqelərinin dayaq məntəqələrinə ətraflı baxış keçirib. Hətta hərbçilərin döyüş hazırlıqları ilə maraqlanıb.

Maraq doğuran məqam S.Mikayelyanın sərhədə getmə səbəbidir? Görəsən, Ermənistan hansı döyüşə hazırlaşır?

Belə görünür ki, 44 günlük İkinci Qarabağ müharibəsində məğlub olan və bununla heç cür barışa bilməyən Ermənistan Ordusu yeni təxribatlara hazırlıq işləri görür.

Azərbaycan-Ermənistan münasibətlərində hazırda sülh sazişinin imzalanması istiqamətində işlərin getdiyi zamanda belə bir hazırlıq ondan xəbər verir ki, İrəvan prosesi uzadaraq vaxt qazanmağa çalışır.

Bu müddətdə sürətlə silahlanmaq, hərbi hazırlıqlar və digər ölkələrin nümayəndələrini Avropa İttifaqının “mülki missiyası”na cəlb etməklə gələcəkdə özünün təhlükəsizliyini NATO çətiri altında təmin etməyə hazırlaşır. Sülh sazişinin imzalanması ilə bağlı rəsmi İrəvan çoxsaylı bəyanatlar səsləndirsə də, reallıqda biz bunun əksini görürük.

Ermənistan xəbər portallarında yayımlanan videonun başlığında bildirilir ki, “Biz hər zaman düşmən ilə üz-üzə gəlməyə hazırıq”.

Əgər Baş nazir Nikol Paşinyanın sülh sazişi imzalamaq niyyəti varsa, nə üçün Silahlı Qüvvələrini sürətli şəkildə silahlandırır və ya nəyə hazırlıq görür? Ümumiyyətlə, hələ də Azərbaycana niyə düşmən gözü ilə baxırlar?

Qeyd edək ki, “Yerkrapa” Könüllülər Birliyi Azərbaycana qarşı müharibədə fəal iştirak edən terror təşkilatıdır. 2020-ci ildə Azərbaycanla 44 günlük müharibədə bu təşkilatın xeyli sayda üzvü ölüb və yaralanıb. Təşkilat 1993-cü ildə keçmiş müdafiə naziri Vazgen Sarkisyanın təşəbbüsü ilə yaradılıb.